உயிருக்கு உத்திரவாதம் இல்லாமல், மாட்டிக் கொண்டால் வாழ் நாள் முழுக்க சிறையில் இருக்க வேண்டும் என்பது தெரிந்தும் திருட்டுத்தனமாக அமெரிக்காவிற்குள் நுழைவோர் எண்ணிக்கை சற்றும் குறைந்தபாடில்லை. நடுஇரவில் முள் வேளிகளுக்குள் புகுந்து, மறைந்து மறைந்து அமெரிக்காவிற்குள் புகுந்து விடுபவர்கள் அதிகம். எவ்வளவோ கட்டுப்பாடுகள், கடுமையான சட்ட திட்டங்கள் இருந்தும் இதை கட்டுப் படுத்த முடியாமல் இன்னமும் திணறிக் கொண்டிருக்கிறது அமெரிக்க அரசு. அப்படி இல்லீகலாக அமெரிகாவிற்குள் புகுந்து வீட்டு வேலை செய்து மெக்ஸிகோவில் பாட்டி வீட்டில் வளரும் தன் மகனுக்காக கஷ்டப்படும் ஒரு தாய் - மகன் கதை தான் 'Under the Same Moon'

அலுவலக நண்பர் ஒருவர் ஸ்டார் மூவீஸில் இந்தப் படத்தைப் பார்த்து விட்டு சொன்னார். படத்தைப் பற்றி அவர் சொல்லும் போது அவர் கண்ணில் தெரிந்த அந்த மின்னலால் அடுத்த நாளே தரவிறக்கிப் பார்த்து விட்டேன். நான்கு வருடங்களாகத் தன்னைப் பிரிந்து அமெரிக்காவில் வசிக்கும் தாயைக் காணக் கிளம்பும் ஒரு சிறுவனின் பயணம் படத்தின் தான் ஒரு வரிக் கதை.

மெக்ஸிகோவில் மகன் நலமுடன் வாழ, அமெரிக்காவில் ஒளிந்து ஒளிந்து பணக்காரர்களின் வீட்டில் வேலை செய்து சம்பாத்திகும் ஒரு தாய், ரொசரியோ (Rosario). வாரம் ஒரு முறை ஞாயிற்றுக்கிழமை, சரியாக பத்து மணிக்கு இரண்டு நிமிடம் மட்டுமே தன் தாயுடன் பேசிக்கொண்டு, அவள் அனுப்பும் பணத்தில் உடல் நலம் சரியில்லாத பாட்டியுடன் வசிக்கும் சிறுவன், கார்லிடோஸ் (Carlitos).

தன்னை அன்பகப் பார்த்துக் கொள்ளும் பாட்டி திடீரென்று ஒரு நாள் தூக்கத்தில் இறந்து விட, தான் இதுவரை சேர்த்து வைத்திருக்கும் பணத்தை எடுத்துக் கொண்டு, அமெரிக்கா கிளம்புகிறான் கார்லிடோஸ், அதுவும் எப்படி? மெக்ஸிகோவிலிருந்து அமெரிக்காவிற்கு மக்களைக் காரின் ஸீட்டிற்கடியில் மறைத்து வைத்து கடத்திச் செல்லும் இருவர் மூலமாக.

சரியாக பார்டரில் வேறு ஒரு பழைய குற்றத்திற்காக கார் மடக்கப்பட்டு, காரேஜிற்குள் விடப்பட, இரவில் வெளியேறுகிறான் கார்லிடோஸ். தனியாக சிறிது தூரப் பயணித்த பிறகு, தான் கொண்டு வந்த பணம் அனைத்தையும் கார் நிறுத்தப்பட்டிருந்த காரேஜிலேயே தொலைத்து விட்டதை உணர்ந்து, ஒரு டாக்ஸியில் அவ்விடத்திற்குச் செல்கிறான். ஆனால் அவன் தொலைத்த இடத்தில் பணமும் இல்லை, காரும் இல்லை. பணமில்லாததால் ஆத்திரமடையும் அந்த டாக்ஸி டிரைவர், சிறுவன் கார்லிடோஸை தப்பான இடத்தில் விற்க முயல்கிறான். அங்கிருந்து அவனைக் காப்பாற்றும் ஒரு வயதான பெண்மணி அவனைத் தன்னுடன் அழைத்துச் செல்கிறாள்.

நான் மேல் சொன்ன அனைத்தையும் காட்சிகளாகப் பார்க்க, இந்தப் படத்தின் டிரைலரை இங்கு சென்று பார்க்கவும்.

இந்தப் படம் பார்த்தவுடன் நான் முன்பு பார்த்த திரைப்படக் கல்லூரியினர் எடுத்த 'ஆசை' என்னும் குறும்படம் ஞாபகத்திற்கு வந்தது. வேறு ஊரில் இருக்கும் தன் தாயுடன் தொலைபேசியில் பேச ஆசைப்படும் ஒரு மளிகைக் கடை சிறுவனின் கதை இந்தப் படம். அற்புதமாக இருக்கும். இங்கு சென்று அதையும் கண்டிப்பாக பார்க்கவும்